IconBM.ru

Покров

Праздник Покрова Пресвятой Богородицы 1/ 14 октября

1360г.

Слово похвално честному Покрову Пресвятыа Владычица Нашеа Богородица и  Приснодѣвѣи Марии. Творение смиренаго ермонаха Пахомиа

Понеже убо человѣческий родъ обыче праздники святыхъ с похвалами праздновати, а иже святѣйшее всѣхъ честныи Царици праздникы Пречистыа Владычица нашея Богородица и Приснодѣвы Мариа попремногу с любовию почитати должны есмы и яко вышьшой святых и вышьшу похвалу приносити, яко Царици и Владычици, Царя и Владыку всѣм рождьшую. Но понеже мало время прииде, отнелѣже праздновахом честный празникъ Рожества Пречистыя Богоматере1: тогда бо рожеством ея праматерняя клятва2 потребися, и Адамъ от вѣчныхъ узъ свободися3, и Богъ к намъ примѣрися; тогда бо Иаковля лѣствица утверждашеся4. Богу хотящю по ней къ человѣкомъ снити и человѣкомъ путь сотворити къ небеснымъ; тогда бо и пророци возрадовашася, своему пророчьствию сбытие зряще5; тогда бо и Давидъ6, видѣвь отъ него правнуку родившуюся7, бряцаа в гусли, играя духомь, глаголя: «Слыши, дщи, и виждь, приклони ухо твое»8; тогда бо не токмо пророци, но превышняа и земленаа вся тварь спразноваше. Нынѣ же прспѣ чьстнѣйший новѣйший Владычици и Богородици Покрова празникъ. Да увѣрятся вси и познають, яко не токмо, егда в мирѣ с нами бяше, ходатайственое кь своему Творцю и Сыну милостивно предлагашеся, молитвеное и милостивное показоваше, но паче и по преславнем тоя преставлении, от земленыхъ въ небеснаа, но и той тогда не престает насъ посѣщающи, милостивное показующи.
Но понеже убо добро есть навыкнути, откуду и коеа ради вины сей пречестный Покрова праздникь уставиша святѣи отцы в Костянтинеградѣ9 праздновати. Елма убо в Костяньтинѣградѣ, в немже спасенаа содѣвахуся, но понеже тамо, истиннѣ умаляемѣй, грѣхъ множашеся, яко и при пророци: видѣ бо Давидъ во Израили истинну умаляему, помолися, глаголя: «Спаси мя, Господи, яко оскудѣ преподобный и яко умалишася истинный от сынов человѣчьскихъ»10. Егда бо правда одолѣваеть безаконию, тогда бо милосердие Божие к себѣ привлачим, а егда ли грѣхъ — тогда и негодование Божие. Якоже преже рѣхом: в Костяньтинѣградѣ нѣкаа стропотная содѣвахуся11, могуща негодование Божие навести. Но нигдѣже не оставляеть Богородительница помощию, но непрестанно молится и молити не престает о человѣчьскомь родѣ. Якоже и дивный Андрѣй, иже мняйся человѣкомъ уродъ быти, но паче многых, иже въ премудрости мнящихся вѣтей, разумомъ превъсходити. Не во внѣшняа премудрости искаше, но паче горняа желаа и к темь подвизашеся, и уродством свое житие великое крыаше, якоже злато во глиннѣм сосудѣ, и сего ради ни славы требуя, ниже срама человѣчьскаго стыдяшеся славы ради оноа, яко да тамошняго срама, еже пред аггелы и человѣки грѣшным бывающа, избѣгнеть. Сему убо блаженному Андрѣеви и со учеником своим Епифаниемь открыся сие божественое и пречюдное Пречистыа видѣние не во снѣ, ниже в гадании, но истинною и на явѣ, якоже явить нынѣ.
Пришедшю блаженному Андрѣю, о немже нам слово, во божественую и великую церковь Владычицы и Богородици, Влахерна именуема12, и со учеником своимь Епифаниемь, видить преславное видѣние, видить бо теплую заступницю христианского рода въ церкви на воздусѣ стоящю и съ множеством вои аггельских чиновъ, и съ Предтечею же, и Богословцем, и со инѣми многыми святыми, молящися, яко мати, со слезами Творцю своему и Богу, еже пощадѣти люди согрѣшившее и согрѣшающее, сице глаголющи: «Боже мой и Творче, и Сыну! Прости всякаа согрѣшениа христианьского рода, на тя Бога и Вседержителя уповающаго, и святое и великолѣпное имя твое призывающих, и мене, рабу твою и матере, любовию почитающим, и от них тебѣ ходатайствующу и молящуся». Тогда бо Владычица и Богородительница, яко дерзновение к нему стяжавши, бяше градъ и люди честнымь своимь омфоромъ покрывающи, показуа милостивное божественое же о человѣцехъ и свое еже о нас ходатайственое. Но понеже и сие божественое чюдо, и покровъ Пречистыа Богородица не утаися, но паче всѣмь явлено бысть, даждь до самого патриарха и царя13, тѣмже пречистый многосвѣтлый праздникъ Покрова Пречистыа составльше, уставиша праздновати мѣсяца октября въ 1, яже творить цѣркви и до сего дни во славу и честь великому Господу Богу и Спасу нашему Исусу Христу и того Пречистой матери, ходатайци и молитвеници еже къ Богу.
Тѣмже убо и намъ откуду, празднолюбци, свѣтлый сей и преславный новѣйший празникъ Покрова Владычици и Спасителницы граду же и людемь многою любовию почитати и достойную честь, яко Царици и Владычици, воздаати, не яко она отъ насъ похвалъ и славы требующи, но паче да мы тою прославимся. Священници и царие и вся племена человѣчьскаа, богатии и нищии и вси людие, похвалу праздничную да воспоим, и да прославимь яко матерь Божию и нашю помощницу. Кождо благодарная да приносить: ово — смѣрение со благоговѣнием, и инъ постъ и молитву да дарствуеть Владычици, и другый да простирает рукы к раздаянию нищим, и ово гнѣвное брату да отпустить, и, тако творяще, Богородицю возвеличим. Такова бо приношениа празничнаа требуеть, а не в тимьпанех и гуслехь, и питиих, якоже еллиньстии отроци празнують, но в молитвахъ Богородителници пѣние, поновлению жизни нашей благодарная, яко длъгъ воздадимъ, благодати не тающе, но заступление исповѣдающе. Чистотою бо та и яко царьскою багряницею украшена, со царемь яко мати царствующи. «Честнѣйшиа херувимь и славнѣйшю серафим»14 воспоем, аще же реку вышшюю небесѣ и земли, и всѣх бывших тварей иже от Адама честнѣйшая, сиа глаголя — не погрѣшю. Егоже бо херувими и серафими зрѣти не могуть, но со страхомъ и трисвятое пѣние приносять, сего Чистаа и Пречистаа Мати своими чистыми и честными рукама сподобися держати; и егоже небеса не возмогають вмѣстити, богоприятная же тоя ложесна нетѣсно вмѣсти, и безъ истлѣниа проиде Вседѣтель: якоже дѣву обрѣте чистую, тако дѣву чистую и по рожествѣ соблюде, яко да не порочно будет дѣвьство. Понеже аще и нѣкыа от дѣвъ от великаго воздержаниа и целомудриа и чистоту соблюдааху, а не еже от естьства, сиа Пречистаа и Приснодѣва Мариа не от воздержаниа нѣкоего чистоту дѣвьства имяше, но от самого тоя естьства, и бес труда чистота велия бяше, понеже тако подобаше Царици и Владычици, дѣвѣ ие и матери Сына Божиа преславна о ней быти, понеже бо преже всѣхъ тварей и вѣкъ Богови преславное вселение пронаречена бывши, о ней же глаголаше пророкъ: «Преславнаа глаголашеся о тебѣ, граде Божий»15; и паки: «Помяну имя твое во всяком родѣ и родѣ»16. Но и сама та Владычица и Богородица пророчьски глаголеть: «Се бо нынѣ блажать мя вси родѣ»17. Вси роди родовъ ту ублажають. Что же глаголю о земленых, но паче въ пренебесныих и самы аггели и архаггели, яко Царици и Матери тѣх сотворшаго, со страхомъ преже стоять, пѣние приносяще. Мы же, грѣшнии, которыми устнами языкъ къ похвалѣ Чистыа отверземь, якоже длъжно ту достойными хвалами величиа Приснодѣвы Богоматери почесть приносити? Аще бо и умъ аггельский не постизает достойными хвалами ту воспѣвати, но елико тѣмь достойно, юже и сам небесный Отець похвали, и Духъ Пресвятый осѣни, и Сынъ Божий от нея безъ истлени проиде, и вся паче естьства и выше человѣчьскаго и аггельская разума о ней таиньства сбышася.
Но что много глаголю? Не испытанна постигнути немощно, но день нынѣшняго празника празнична же глаголются. Кто бо исповѣсть величиа, еже нынѣ бывшее преславное Владычици чюдо и явление своимь угодникомь, и молитьвеное и милостивное еже ко Сыну своему и Богу о согрѣшающих моление? Что воздааниа противу тоя благодѣяниа воздадимъ? Точию оное архаггельское слово, яко достойно радости, глаголемь: «Радуйся, обрадованнаа, Господь с тобою18, и тебе ради — со человѣки! Радуйся, словесный раю, в немже божественое древо насаждено бысть, Христосъ, а не оно древо, и Адама умершвлей, но паче всѣмъ бесмертие и животъ дарующее19! Радуйся, божественый киоте, небеснаго бисера в себѣ носящи, Христа, и источниче живыа воды, животъ намъ источившиа! Радуйся, архаггельское ликование и аггельское веселие, и земленородныхъ обновление! Радуйся, Моисиовъ жезлѣ20, море раздѣлившее и фараона мучителя силою сына твоего потопльшее, и изрядны люди в землю обѣтованиа наставльшиа! Радуйся, купно царский и священничьский Аароновъ жезле21, от негоже прекрасный цвѣтъ, Христос, процвѣте, и ис тебе безъ истлѣниа родися! Радуйся, свѣтило невечерняго свѣта, всю тварь освѣщающи и еретичьскую мглу далече нѣгдѣ отгонящи! Радуйся и ты, блаженне и преблаженне Андрѣе, отче нашь, и со блаженым учеником Епифаниемь, иже неизреченных видѣний таинникь и зритель извѣстны бывша! Радуйся и ты, блаженней Епифание, сподобивыйся такова учителя ученикь преизрядный нарещися! Блажени же и вси людие, иже пречестный твой праздникъ почитающе, Владычице: тебе бо ради нашь град и вся вселенная от льсти диавольскиа избавися, и крестом Сына твоего всеродный Адамъ в райскую породу паки возвращается; и тебе ради, Владычице, страсти от человѣкь отгонятся, и здравие душевное и телесное приемлемь. Ты бо еси печалным милостивное утѣшение, обрадование, ты бо — Мати истиннаго живота; аще и прииде от земля ко небесныимь, но с плотию жива сущи, тѣмже и тамо съ Царемь и Сыномъ присно соцарствуеши вь небесныих. Тѣмже молимся тебѣ, яко милостивой и милостиваго Бога рождеши сродствиа нашего: аще и согрѣшихом, помощию не отступай, но присно предваряа от бѣдъ и скорбей избавляа насъ. Ты бо, Владычице, православнымь людемъ прибѣжище и град твердый от лица вражиа, и твоего заступлениа и помощи требуемь, и твоею надеждею крѣпимся, и силою Сына твоего противныа полци побѣждаются. Тѣмже, Богородителнице, якоже тогда милостивно о людехъ, тебе чтущих Царицю, промышляше полезнаа, тако и нынѣ не престай своимъ честным покровом покрывающи и совѣты варварьскыа, иже ратующих, низложи, и всѣхъ, иже въ честный храмъ твой приходящих и молитвы и молениа тебѣ приносящих, спасай. Яко да твоими молитвами настоящую жизнь сию немятежно прейдемь и вѣчных благъ сподобимся о томь самом Владыцѣ и Господѣ нашем Исусѣ Христѣ, емуже слава и держава, честь и поклоняние со безначалным Отцемь и Пресвятым, и Благым, и Животворящимь Духомъ и нынѣ и присно, и въ вѣкы вѣкомь. Аминь».
Примечания
1.   Рождество Пресвятой Богородицы — двунадесятый праздник православной церкви, отмечается 8 сентября.
2.   ...праматерняя клятва... — Праматерь — так именуется Ева, прародительница всех живущих, жена первого человека Адама; праматерняя клятва — имеется в виду наказание, наложенное на Еву Богом за нарушение райской заповеди.
3.   ...и Адамъ отъ вѣчныхъ узъ свободися... — Адам — первый человек, родоначальник всего человечества; грехопадение Адама — один из центральных моментов христианского догматического учения, оправдание, спасение и жизнь людям дарованы только через пришествие «второго Адама» — Иисуса Христа.
4.   ...Иаковля лѣствица утверждашеся... — Иаков — ветхозаветный патриарх, он же — Израиль, второй сын Исаака, еврейского патриарха. Согласно Библии Иаков получил предсмертное отеческое благословение, права первородства, вместо своего брата-близнеца Исава, который после смерти отца решил отомстить ему. Испугавшись мести брата, Иаков бежал в Харран. По пути, в Лузе, его посетило чудесное сновидение: он увидел лестницу, спускавшихся ангелов и Господа, услышал божественный голос, после чего уверовал в то, что само Провидение отдало ему права первородства. Символ виденной Иаковом лестницы, соединившей небо и землю, стал пророческим символом рождества Богородицы.
5.   ...и пророци возрадовашася, своему пророчъствию сбытие зряще... — Вероятно, имеются в виду пророчество ветхозаветного пророка Исайи (VIII в. до Рождества Христова; память 9 мая), предсказавшего пришествие Мессии, за что и получившего прозвище «ветхозаветного евангелиста», в «Книге пророка Исайи» сказано: «Дева во чреве приимет, и родит Сына, и нарекут имя ему: Еммануил» (Исх. 7, 14); видение Иаковом лестницы, соединявшей землю и небо (см.: Быт. 28, 12); предсказания пророка Иеремии (VII—VI вв. до Рождества Христова), предчувствовавшего превосходство и необходимость Нового Завета; предвидение пророком Иезекиилем двери затворенной, через которую прошел Бог Израилев, чтобы посетить и дать избавление людям своим (см.: Иез. 44, 2); свидетельство Иоанна Крестителя, предрекавшего пришествие Иисуса Христа (см.: Иоан. 1, 15).
6.   Давид — воин, пророк, псалмопевец, еврейский царь, царствовал с 1055 по 1015 г. до Рождества Христова. Победив великана Голиафа, приобрел народное расположение, но преследовался Саулом, от которого спасался бегством, после смерти Саула стал царем, впоследствии завоевал Иерусалим и перенес туда свою резиденцию и Ковчег Завета. Задумал создание храма Богу, строительство которого поручил своему сыну Соломону.
7.   ...видѣвъ отъ него правнуку родившуюся... — Имеется в виду, что Богородица по отцу (св. Иоакиму) происходила от Давидова рода.
8.   «Слыши, дщи, и виждь... ухо твое»... — Пс. 44, 11.
9.   ...Констянтинеградѣ... — Константинополь — город основан императором Константином в 303 г. (отсюда и его название), русское название Царьград, столица Византийской империи, расположен на берегу пролива Босфор, его европейской части. В 1453 г. город покорен турками, он становится столицей Османской империи, получив название Стамбул.
10. «Спаси мя, Господи... отъ сыновъ человѣчьскихъ». — Ср. Пс. 11, 2.
11. ...в Костянтинѣградѣ нѣкая стропотная содѣвахуся... — Речь идет о вторжении сарацинов в пределы Византии и об упадке самой Греческой империи в X в.
12. ...Влахерна именуема... — Влахернская Богородичная церковь.
13. ...даждь до самого патриарха и царя... — По преданию, праздник Покрова был установлен при царе Льве VI Мудром (Философе) в начале Х в., в это время в Константинополе сменилось два патриарха Николай I (895—906) и Евфимий II (906—911). Описание иконы Покрова Богородицы, относящееся к XV в., называет имя св. патриарха Тарасия (784—806), стоящего в ряду людей, символически представляющих весь род человеческий вместе с императором Львом Философом, императрицей Феофаной, Романом Сладкопевцем, св. Андреем и Епифанием. (См.: Сычев Н. П. Древлехранилище памятников русской иконописи и церковной старины имени императора Николая II при Русском музее императора Александра III. Петроград, 1916. С. 23).
14. «Честнѣйшиа херувимь и славнѣйшю серафимъ»... — Используется текст церковного песнопения в честь Пресвятой Богородицы «Честнейшую херувим и славнейшую во истину серафим без истления Бога Слово рождшую сущую Богородицу тя величаем...»
15.  «Преславная глаголашеся о тебѣ, граде Божий»... — Пс. 86, 3.
16.  «Помяну имя твое во всяком родѣ и родѣ». — Ср. Пс. 101, 13; Пс. 134, 13.
17.  «Се бо нынѣ блажать мя вси родѣ». — Лк. 1, 48.
18. Радуйся, обрадованная, Господь с тобою... — Рефрен Акафиста Богородице, далее используется акафистная форма песнопений.
19. ...а не оно древо... животъ дарующее! — В Едеме, райском саду, было два дерева — дерево познания добра и зла, от которого вкусил запретные плоды вместе с Евою Адам, за что был изгнан из Рая и лишен бессмертия, и дерево жизни (Быт. 2, 9).
20.  ...Моисеовъ жезле... — Жезл Моисея, жезл знамения (Исх. 4, 17); в книге Исход (14, 15—30) повествуется о том, что Господь жезлом Моисея при переходе через Чермное море разделил воды для Израиля и потопил преследовавшие избранный народ войска фараона. Моисей вывел еврейский народ из Египта и привел в землю Ханаанскую, обетованную.
21.  ...Аароновъ жезле... — Имеется в виду пустивший почки и расцветший жезл первого ветхозаветного первосвященника, старшего брата Моисея, Аарона (Чис. 17, 8). Согласно учению апостола Павла Аарон был прообразом Иисуса Христа, первосвященника Нового Завета (Евр. 5, 4—6).